ဂျပန်အာကာသယာဉ် အောင်မြင်မှု ပြည်သူတွေ သြဘာပေး

ဂျပန်နိုင်ငံမှာ အာကာသအရေး တက်ကြွနေသူတွေ ဂျပန်အာကာသယာဉ်တခုကနေ အစိတ်အပိုင်းတခုကို အောင်မြင်စွာ ခွဲထုတ်နိုင်ပြီး ကမ္ဘာမြေပြင်ပေါ် ပြန်လွှတ်လိုက်တာကို အားပါးတရ သြဘာပေး ပျော်မြူးခဲ့ကြပါတယ်။

Hayabusa 2 အာကာသယာဉ်အနေနဲ့ ခုလို အောင်မြင်စွာ မြေပြင်ပေါ်ကို ပြန်ချပေးလိုက်တဲ့ ယာဉ်အစိတ်အပိုင်းထဲမှာ ကမ္ဘာဂြိုဟ်ပေါ်က နေရောင်စနစ်နဲ့ သက်ရှိသဘာဝ မူရင်းဇာစ်မြစ်ကို သိရှိနိုင်ဖို့ လမ်းစဖွင့်ပေးနိုင်မယ့် အနားက ဂြိုဟ်သိမ်ဂြိုဟ်မွှားတခုရဲ့ စမ်းသပ်နမူနာတွေ ပါသွားမယ်လို့ ဂျပန်အာကာသအဖွဲ့က ဆိုပါတယ်။

ဂျပန်အာကာသလေ့လာရေး အေဂျင်စီအဖွဲ့က ဒီ အာကာသယာဉ် အစိတ်အပိုင်းကို မနေ့ နေ့လယ်ကပဲ မိုင်ပေါင်း ၁၃၆,၇၀၀ အကွာမှာ တကယ့်ကို ခက်ခဲတဲ့ စိန်ခေါ်မှုကြီးတွေ ကျော်လွှားပြီး အသေအချာ အသေးစိတ် ထိန်းချုပ်စီမံမှုတွေနဲ့ ခုလို အောင်မြင်စွာ ဖြုတ်ချနိုင်ခဲ့တာလို့ ထုတ်ပြောလိုက်ပါတယ်။

အသက် ၆၀ အရွယ် ကွန်ပြူတာပညာရှင် Ichiro Ryokou က “အရင် Hayabusa အာကာသယာဉ်အဖြစ်တုန်းက တကယ့်ကို ဆိုးဆိုးဝါးဝါး အခြေအနေနဲ့ ပြန်ဆင်းလာခဲ့ရတယ်။ အခု Hayabusa အတွက်တော့ တကယ့်ကို ချီးကျူးလိုက်ပြီ။ ဘာလို့လဲဆိုတော့ ဒီတခေါက် ဘာပြဿနာမှ မတက်ခဲ့ဘူး” လို့ ဂျပန်လို ပြောသွားတာပါ။

ဂျပန်နိုင်ငံတလွှားမှာတော့ အာကာသခရီး စိတ်ဝင်စားကြသူတွေအနေနဲ့ ဒီ အာကာသယာဉ် အစိတ်အပိုင်း အောင်မြင်စွာ ဖြုတ်ချနိုင်ခဲ့တာကို အများပြည်သူကြည့်နိုင်တဲ့ နေရာတွေကနေ အုတ်အော်သောင်းနင်း အားပေးခဲ့ကြပါတယ်။

တကယ်တော့ ဒီအာကာသယာဉ် အစိတ်အပိုင်းဟာ သြစတြေးလျနိုင်ငံ တောင်ပိုင်းက လူနေကျဲပြီး အာကာသစခန်းတွေရှိတဲ့ Woomera မြို့မှာ ဒီနေ့ တနင်္ဂနွေနေ့ ဆင်းသက်ရောက်ရှိလာမှာ ဖြစ်ပါတယ်။

VOA News

ယခုကဲ့သို့ နောက်ဆုံးရသတင်းများနှင့် သိရှိလိုသော ဒေသဆိုင်ရာအချက်အလက်များကို www.winnetmyanmar.com နှင့် winnetmyanmar Facebook Page တို့တွင် ဝင်ရောက်ဖတ်ရှု ရေးသား ဆွေးနွေးနိုင်ပါသည်။