အသေးစားချေးငွေယူထားသူတွေ ငွေပြန်ဆပ်ရမယ့်အစီအစဉ် အစိုးရ ယာယီရပ်ဆိုင်း
ကိုဗစ်ကပ်ရောဂါကာလမှာ အခက်အခဲကြုံနေသူတွေ ပြန်ဆပ်ရမယ့် အသေးစားချေးငွေတွေကို ယာယီဆိုင်းထားပေးဖို့ အစိုးရက ကြေညာလိုက်တဲ့အပေါ် တုံ့ပြန်ချက်တွေကို ပြောပြပါမယ်။
ကပ်ရောဂါကာလမှာ အသေးစားချေးငွေ လုပ်ငန်းတွေအနေနဲ့ နိုဝင်ဘာနဲ့ ဒီဇင်ဘာအထိ ချေးငွေတွေကို ပြန်လည်မကောက်ခံပဲ ယာယီဆိုင်းငံ့ထားဖို့ အစိုးရက ညွှန်ကြားလိုက်ပါတယ်။
နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ကလည်း ကိုဗစ်ကပ်ရောဂါ ကူးစက်မှုများတဲ့ ရန်ကုန်တိုင်း ပဲခူးတိုင်းနဲ့ ရခိုင်ပြည်နယ်တွေမှာ ကြွေးကျန်တွေ ဆိုင်းငံ့ပေးဖို့ ဆောင်ရွက်နေကြောင်း တနင်္လာနေ့ည အွန်လိုင်းမိန့်ခွန်းမှာ ထည့်သွင်းပြောဆိုသွားပါတယ်။
“ကျမတို့နိုင်ငံရဲ့ ငွေရေးကြေးရေး အခြေအနေအရပေါ့နော် အရင်းအမြစ်အခြေအနေအရဆိုရင် တစ်တိုင်းပြည်လုံးကိုတော့ ကျမတို့ ဒီကိစ္စကို ကူညီလို့မရပေမယ့် ကိုဗစ်ရောဂါ ပြန့်ပွားမှုလည်း အများဖြစ်ပြီးတော့ လူဦးရေလည်းများတဲ့ ပြည်တစ်ခုနဲ့ တိုင်း ၂ခုကို ကျမတို့ရွေးပြီးတော့ အဲ့ဒါကို ရခိုင်ရယ် ပဲခူးရယ် ရန်ကုန်ရယ်ပေါ့နော်၊ ရွေးပြီးတော့ အဲ့ဒီမှာဆိုလို့ရှိရင် အဲ့ဒီက အသေးစာငွေချေးအဖွဲ့အစည်းတွေကို ကျမတို့ အစိုးရအဖွဲ့နဲ့ ညှိပြီးတော့ ပြန်ပြီးတာ ဆပ်ရမယ့် ပြည်သူတွေအနေနဲ့ ဆိုင်းငံ့ပေးဖို့ ကြွေးကျန်တွေ ဆိုင်းငံ့ပေးဖို့ အစီအစဉ်ကို ကျမတို့စပြီးတော့ ဆောင်ရွက်နေပါတယ်၊ ဒီလို ကျမတို့ ချေးငွေလိုအပ်တဲ့ ပြည်သူများမိမိတို့ရဲ့ စီးပွားရေးလုပ်ငန်းတွေ ပံ့ပိုးဖို့အတွက် ချေးငွေလိုအပ်တဲ့ ပြည်သူများရနိုင်ဖို့အတွက် အစီအစဉ်တွေလည်း ကျမတို့စပြီး ဆွေးနွေးနေပါတယ်၊ ဒါ မကြာမီ ကျမတို့ နှစ်ပတ် သုံးပတ်လောက်အတွင်းမှာ ဘယ်လိုအစီအစဉ်တွေရှိလဲဆိုတာ ကျမတို့ ပြည်သူတွေကို တင်ပြနိုင်မယ်လို့ မျှော်လင့်ပါတယ်။”
ကပ်ရောဂါကာလ ချေးငွေတွေ ပြန်ဆပ်ဖို့ အခက်အခဲရှိသူတွေအတွက် ရည်ရွယ်ပေမဲ့ အသေးစားချေးငွေ လုပ်ငန်းရှင်တွေ ကြားမှာတော့ အစိုးရရဲ့ အစီအစဉ်အပေါ် စိုးရိမ်တဲ့ သဘောထားတွေလည်း ရှိနေပါတယ်။ မန္တလေးတိုင်းက အသေးစားချေးငွေလုပ်ငန်းရှင် ဒေါ်ခင်သက်မော် ကတော့ အစိုးရရဲ့ အစီအစဉ်ကြောင့် လုပ်ငန်းရှင်တွေဘက်မှာ အခက်အခဲတွေ ကြုံရနိုင်တယ်လို့ ပြောပါတယ်။
“တစ်ချို့က တကယ်အဆင်မပြေတာ ၊ တချို့ကကျတော့ ဒါကို အခွင့်အရေးတစ်ခုအနေနဲ့ ယူပြီးတော့ မပေးဖြစ်တာ၊ အဲ့ဟာမျိုးတွေရှိတဲ့အခါကျတော့ သူတို့ တကယ်အဆင်မပြေတဲ့ လူတွေက ကျမတို့က ညှိုနှိုင်းပြီးတော့ ကျမတို့ ရက်ရွှေ့ ပေးတာတို့ ဘာတို့ လုပ်ပေးတဲ့အခါမှာ အဆင်ပြေတယ်၊ ဒါပေမယ့် ပေးကိုမပေးချင်တဲ့ လူတွေကကျတော့ သူတို့ကိုယ်တိုင်မပေးတာမဟုတ်ဘဲနဲ့ ပတ်ဝန်းကျင်ကိုပါ မပေးအောင်လို့ လှုံ့ဆော်တဲ့အခါကျတော့ ကျမတို့ လုပ်ငန်းတွေအနေနဲ့က အရမ်းအခက်အခဲ ရှိပါတယ်။”
ချေးငွေတွေ ပြန်ရမှာသာ နောက်လူတွေ ပြန်ချေးနိုင်မှာဖြစ်တာကြောင့် ဆိုင်းငံ့ထားရမယ်ဆိုရင် လုပ်ငန်းတွေ ပြန်လည်ပတ်ဖို့ အခက်အခဲရှိတယ်လို့လည်း ပြောပါတယ်။ ကပ်ရောဂါကြောင့် အိမ်ပြင်မထွက်ရ ညွှန်ကြားချက် ထုတ်ပြန်ထားတဲ့ ရန်ကုန်တိုင်းက အသေးစားချေးငွေ လုပ်ငန်းရှင် ဦးဝင်းထက်မောင်မောင်ကတော့ လုပ်ငန်းရှင်တွေအတွက် စိန်ခေါ်မှုတွေ ကြုံရမှာ စိုးရိမ်တယ်လို့ ပြောပါတယ်။
“ကြီးမားတဲ့ စိန်ခေါ်မှုတွေ အများကြီး အခက်အခဲတွေ ကြုံလိုက်ရပါတယ်။ အထူးသဖြင့် ရန်ကုန်နဲ့ ရခိုင်ရယ် ၊ ပဲခူးရယ်ပေါ့နော် အဲ့ဒီမှာ ရှိတဲ့ အသေးစားချေးငွေလုပ်ငန်းတွေ အကုန်လုံးက ကောက်ခံဖို့အတွက်ကို ရပ်နားပါဆိုပြီးတော့ ဒီတိုင်းသုံးတိုင်းကနေပြီးတော့မှ ကျနော်တို့ အဓိကအားဖြင့် အခက်အခဲတွေ အများကြီး ရတယ်ပေါ့၊ ဆိုတော့ အဓိက အခက်အခဲကဘာရှိလဲဆိုတဲ့အခါမှာ ကျနော်တို့ ဒီနှစ်လအတွက်ပေါ့နော် ပုံမှန်အားဖြင့်ဆိုရင် ကျနော်တို့ရဲ့ ထုတ်ချေးတဲ့ customers တွေ ဆီကနေပြီးရတဲ့ဝင်ငွေရယ် နောက်ပြီးလို့ရှိရင် ကျနော်တို့ ထုတ်ချေးတဲ့ ငွေအပေါ်မှာ ပြန်ကောက်ယူရတဲ့ ငွေကမှ တဆင့် ကျနော်တို့ပြန်ပြီး ထုတ်ချေးတယ်ဆိုတော့ အဲ့ဒီ mechanism တစ်ခုလုံးက ဒီ ၂ လ လုံးဝရပ်သွားပါတယ်။”
အစိုးရကတော့ ကပ်ဘေးကာလ အခက်အခဲ ကြုံနေရသူတွေကို အကြွေးတွေ ပြန်ဆပ်ဖို့ အတင်းအကြပ် ဖိအားပေးတာတွေ မလုပ်ဖို့နဲ့ မလိုက်နာရင် အရေးယူမှာဖြစ်ကြောင်းလည်း သတိပေးထားပါတယ်။ နိုင်ငံတော် အတိုင်ပင်ခံပုဂ္ဂိုလ်ရဲ့ အွန်လိုင်းမိန့်ခွန်းမှာတော့ အခြေခံလူတန်းစားတွေ အပါအဝင် မြန်မာပြည်သူတွေကြား ချေးငွေလိုအပ်ချက်တွေ ရှိနေတာကို နားလည် သဘောပေါက်ကြောင်းနဲ့ လိုအပ်ချက်တွေကို ဖြည့်ဆည်းနိုင်ဖို့လည်း စီစဉ်နေကြောင်း ထည့်သွင်းပြောဆိုထားပါတယ်။
Crd VOA News