အမေရိကန်မှာ တရက်ထဲ ကိုဗစ်ကူးစက်သူ တစ်သိန်းကျော်

ကမ္ဘာ့ကိုဗစ်ထိပ်ဆုံး အမေရိကန်နိုင်ငံမှာ ပထမဆုံး စံချိန်တင်ပိုးတွေ့သူသစ် ဗုဒ္ဓဟူးနေ့တနေ့ထဲမှာ ၁၀၀,၀၀၀ ကျော်ခဲ့တယ်လို့ Atlantic မဂ္ဂဇင်းရဲ့ ကိုဗစ်စောင့်ကြည့်ရေးအစီအစဉ်အဖွဲ့က ဆိုလိုက်ပါတယ်။

အမေရိကန်နိုင်ငံမှာ ကိုရိုနာဗိုင်းရပ်စ်ကူးစက်မှုတွေ ပြန်တက်လာနေတာကို အထူးသဖြင့် နိုင်ငံ အနောက်အလယ်ပိုင်း၊ နောက် နိုင်ငံအလယ်ပိုင်းနဲ့အနောက်ပိုင်း ဒေသတွေကျယ်ကျယ်ပြန့်ပြန့်ပါတဲ့ Great Plains (ခေါ်) ကြီးမားတဲ့လွင်ပြင်ဒေသတွေ တလျှောက်မှာ တွေ့ကြုံနေရပါတယ်။

ဒါ့အပြင် အမေရိကန်နိုင်ငံတလွှား ဆေးရုံတင်ရသူပေါင်းလည်း ၂ ရက်ဆက်တိုက်အဖြစ် မနေ့ဗုဒ္ဓဟူးနေ့မှာ ၅၀,၀၀၀ ကျော်နေကြောင်း ဒီ ကိုဗစ်စောင့်ကြည့်ရေးအစီအစဉ်က မှတ်တမ်းတင်ထားပါတယ်။

ဒီကမ္ဘာ့ကပ်ရောဂါကြီး ဥရောပတလွှားမှာလည်း ဒုတိယလှိုင်းအဖြစ် ပြန်ဖြစ်လာနေချိန်မှာ အရင်အသည်းအသန်ဖြစ်ခဲ့တဲ့ အီတလီမှာ ဝန်ကြီးချုပ် Giuseppe Conte က၊ ကိုဗစ်ခေါင်းပြန်မထောင်အောင်ထိန်းနိုင်ရေး ကန့်သတ်မှုအမျိုးမျိုးပါတဲ့ အဆင့် (၃) ဆင့်စနစ်သစ်ကို ကြေညာလိုက်ပါတယ်။

ဒီစနစ်အရ အီတလီက ဒေသပေါင်း ၂၀ ကို ၃ ပိုင်းခွဲကာ ကန့်သတ်မှုအရ အများဆုံးအဖြစ် အနီရောင်၊ နောက် အလယ်အလတ် လိမ္မော်ရောင်နဲ့ အနည်းဆုံးအဖြစ် အဝါရောင်ဇုန်တွေ ခွဲခြားသတ်မှတ်လိုက်ပါတယ်။

အနီရောင်သတ်မှတ်ထားတဲ့ဒေသမှာ နိုင်ငံမြောက်ပိုင်းဒေသတွေဖြစ်တဲ့ Lombardy၊ နောက် Piedmont နဲ့ Valle d’ Aosta အပြင် တောင်ပိုင်းက Calabria ဒေသတို့ပါဝင်ကာ အဲဒီကလူတွေအနေနဲ့ အလုပ်နဲ့ ကျန်းမာရေးအတွက်ကလွဲလို့ အိမ်ပြင်ထွက်ခွင့်မပြုပါဘူး။

နောက်လိမ္မော်ရောင်ဒေသထဲမှာ Puglia နဲ့ တေင်ပိုင်းက Sicily ကျွန်းတို့ပါဝင်ပြီး အဲဒီကလူတွေအနေနဲ့ ဒေသတွင်းမှာ လွတ်လွတ်လပ်လပ်သွားနိုင်ပေမဲ့ ဒေသအပြင်ဘက် တခြားနေရာတွေကို သွားခွင့်ပိတ်ထားပြီး စားသောက်ဆိုင်နဲ့ဘားတွေမှာ ပါဆယ်စနစ်နဲ့သာရောင်းချခွင့်ပေးထားပါတယ်။

Crd VOA News