အိန္ဒိယနဲ့ မြန်မာ နယ်စပ်မှာ အကျဉ်းသား အပြန်အလှန်လဲလှယ်
မြန်မာနဲ့အိန္ဒိယအစိုးရတို့အကြား နှစ်ဖက်အကျဉ်းသားစုစုပေါင်း ၆၀ ကျော်ကို အပြန်အလှန် လွှတ်ပေးခဲ့ကြရာမှာ၊ မြန်မာအကျဉ်းသား ၂၈ ဦးနဲ့ အိန္ဒိယအကျဉ်းသား ၃၄ ဦးပါဝင်ခဲ့ပါတယ်။
မြန်မာအကျဉ်းသားတွေထဲ အိန္ဒိယနိုင်ငံထဲကို နိုင်ငံခြားသားဗီဇာနဲ့ အရင်ရောက်နေခဲ့ပြီး၊ ကုမ္ပဏီတစ်ခုမှာ အလုပ်လုပ်ခဲ့တဲ့ မြန်မာ ၁၉ ဦးကတော့၊ ကိုဗစ်ဖြစ်ချိန်အလုပ်ပြုတ်ပြီး၊ ဗီဇာလဲကုန်သွားချိန်မှာ၊ မြန်မာပြည်ဖက်ပြန်ဖို့ကြိုးစားရင်း၊ နယ်စပ် အာသံဘက်မှာ အဖမ်းခံရကာ၊ ထောင် ၄ လကျခဲ့တာလို့ အန္ဒိယအရာရှိတွေကဆိုပါတယ်။
နောက်မြန်မာ ၈ ဦးကတော့ တရားမဝင် ဝင်ရောက်နေထိုင်မူနဲ့ မဏိပူပြည်နယ်က ထောင်တွေထဲ အကျဉ်းချခံခဲ့ရတာလို့၊ ဒီ အိန္ဒိယအရာရှိတွေက ဆိုပါတယ်။ မဏိပူပြည်နယ် ပြည်ထဲရေးဒုဝန်ကြီး Yengkhom Rashni ကလည်း၊ ဒီအကျဉ်းသားလဲလှယ်မူကိုကူပေးနေတယ်လို့ဆိုပါတယ်။
အိန္ဒိယအကျဉ်းသား ၃၄ ဦးထဲမှာတော့ အများစုက တရားမဝင် ဝင်ရောက်ခဲ့သူတွေဖြစ်ပြီး၊ အကြမ်းဖက်သူ ၂ ဦးပါခဲ့ကာ၊ Tripura နဲ့ မဏိပူ တရားမဝင်အဖွဲ့တွေကဖြစ်တယ်လို့၊ ကြာသာပတေးနေ့မှာ ဒီအကျဉ်းသားအလဲအလှယ်လုပ်ခဲ့တဲ့၊ နှစ်ဖက်ပူးတွဲစစ်ဆေးရေးဂိတ်ရှိတဲ့ အိန္ဒိယနယ်စပ်ဖက် မဏိပူပြည်နယ် မိုးရေးမြို့က အရာရှိတစ်ဦးက ဆိုပါတယ်။
တချိန်ထဲမှာ ဗုဒ္ဓဟူးနေ့တုန်းကတော့၊ ဘင်္ဂလားဒေ့ရှ်နယ်စပ်ဒုက္ခသည်စခန်းက မြန်မာဘက်က မွတ်ဆလင်ဒုက္ခသည် ၁၄ ဦးကိုလည်း၊ အိန္ဒိယနိုင်ငံထဲခိုးဝင်လာလို့ အနောက် Bangal ပြည်နယ် New Jalpaiguri ရထားဘူတာရုံမှာ ဖမ်းဆီးလိုက်တာမှာ အမျိုးသမီး ၈ ဦးနဲ့ ကလေးငယ် ၂ ဦး ပါဝင်ပါတယ်။
ဒီဘင်္ဂလားဒေ့ရှ် ဒုက္ခသည်စခန်းကထွက်ပြေးလာတဲ့ ဒီမွတ်ဆလင်ဒုက္ခသည်တွေအနေနဲ့ အိန္ဒိယနိုင်ငံ အရှေ့မြောက်ဒေသ ပြည်နယ်တွေကနေ ခိုးဝင်ပြီး အလုပ်လာရှာလေ့ရှိရာမှာ၊ လူကုန်ကူးဂိုဏ်းတွေ လက်ထဲရောက်လေ့ရှိတယ်လို့ ဒီအမည်မဖော်လိုတဲ့ အိန္ဒိယအရာရှိတွေက ဆိုပါတယ်။
VOA News