မြကန်သည် မန္တလေးတိုင်းဒေသကြီး၊ ညောင်ဦးမြို့နယ်၊ ညောင်တိုကျေးရွာအနီး၊ တုရင်းတောင်အနောက်ဘက်တွင် တည်ရှိပါသည်။ ကျန်စစ်သားမင်းကြီးကိုယ်တိုင် ဦးဆောင်လျက် ပုဂံသူ ပုဂံသားတို့ စီမံတူးဖော်ခဲ့သော ကန်ဖြစ်ပါသည်။ မြကန်၏ မူလအမည်မှာ မဟာနိဗ္ဗာန လက်ဆွဲချီရေ (မဟာနိဗ္ဗာန် လက်ဆွဲချီကန်)ဟု ကျောက်စာများ၌ တွေ့ရသည်။ မြကန်သည် ပိုက်လှမ်းတောင်အား တာတမံ အရံအတားမျိုး ပိတ်ဆို့ကာဆီး၍ စီမံထားသော တစ်ဖက်ဆည်ကန် ဖြစ်သည်။ သက္ကရာဇ် ၅၉၈−ခုနှစ်တွင် ပုဂံကျစွာမင်းကြီးက မြကန်ကို ပြန်လည်၍ ပြုပြင်ဆည်ဖို့ခဲ့ပါသည်။ မြကန်သည် အလျား ၃၃၀၀ ပေ၊ အမြင့် ၃၂ ပေ၊ ကန်ရေပြည့်ရေလှောင်ပမာဏ ၁၀၅၀ ဧကပေရှိသည့် မြေသားကန်ဖြစ်ပါသည်။ ၁၉၉၇ ခုနှစ်တွင် မြကန်ကို ပြန်လည်ပြုပြင် ဆည်ဖို့ပြီးစီးခဲ့ပါသည်။
