တောင်ကိုရီးယားမှာ နှာခေါင်းစည်းမတပ်သူတွေ ဒဏ်ငွေရိုက်ပြီ
တောင်ကိုရီးယားနိုင်ငံမှာ နေ့စဉ်ဗိုင်းရပ်စ်ကူးစက်မှုတွေဟာ ရက်ပေါင်း ၇၀ အတွင်းမှာ အများဆုံးဖြစ်လာခဲ့ပြီး တောင်ကိုရီးယားအစိုးရက အပြင်ထွက်တဲ့အခါမှာ နှာခေါင်းစည်းမတပ်တဲ့သူတွေကို စတင်ပြီးတော့ ဒဏ်ရိုက်နေပါတယ်။ တောင်ကိုရီးယားမှာ ဒီနေ့ ဗိုင်းရပ်စ်ကူးစက်ခံရသူ ၁၉၁ ယောက်ရှိပြီး ဒါဟာ စက်တင်ဘာ ၄ ရက်နောက်ပိုင်း နေ့စဉ်ကူးစက်မှုမှာ အများဆုံးဖြစ်သလို ကူးစက်သူ ၁၀၀ ကျော်သွားခဲ့တာ ၆ ရက် ဆက်တိုက်ရှိသွားပြီဖြစ်ပါတယ်။ ဒီနေ့ရောဂါပိုးတွေ့ရှိသူတွေထဲက ၁၂၀ ကျော်ဟာ ဆိုးလ်မြို့တဝိုက်က ဖြစ်ပါတယ်။ ဒီနေ့ကစပြီး အများပြည်သူနဲ့ သက်ဆိုင်တဲ့နေရာတွေမှာနှာခေါင်းစည်းသေချာမတပ်ဆင်တဲ့သူတွေကို အမေရိကန်ဒေါ်လာ ၉၀ ဒဏ်ငွေ ရိုက်မှာဖြစ်ပါတယ်။
မွန်ဂိုလီးယားနိုင်ငံမှာတော့ ဗိုင်းရပ်စ်ကူးစက်မှုအသစ်တွေ တွေ့ရှိပြီးတဲ့နောက် မြို့တော် အူလမ်ဘာတာအပါအဝင် နိုင်ငံတဝန်းမှာ လူတွေကို လာမယ့် အင်္ဂါနေ့အထိ အပြင်မထွက်ဘဲ အိမ်ထဲမှာနေဖို့ အမိန့်ထုတ်ထားပါတယ်။ ဒေသခံတွေအနေနဲ့ ဈေးဝယ်ဖို့၊ ဆေးခန်းပြဖို့ စတဲ့ကိစ္စတွေအတွက်ပဲ အပြင်ထွက်ခွင့်ရတာဖြစ်ပြီး အပြင်ထွက်တဲ့အခါမှာလည်း တစ်ယောက်နဲ့ တစ်ယောက်ခပ်ခွာနေကြဖို့ ညွှန်ကြားထားပါတယ်။
အိန္ဒိယနိုင်ငံ နယူးဒေလီမြို့မှာတော့ အစိုးရဆေးရုံတွေမှာ ကိုဗစ် ၁၉ ရောဂါကူးစက်ခံရတဲ့သူတွေကို လက်ခံနိုင်တဲ့ ပမာဏ ပြည့်သွားပြီဖြစ်လို့ ဒေလီမြို့က ပုဂ္ဂလိက ဆေးရုံ ၃၃ ခုက အရေးပေါ်ကုသဆောင်ရဲ့ ကုတင် ၈၀% လောက်ကို ချန်ထားပေးဖို့ နယူးဒေလီမြို့ အစိုးရအာဏာပိုင် တွေကပြောလိုက်ပါတယ်။ အိန္ဒိယနိုင်ငံတဝန်းမှာ ဒီနေ့ နေ့စဉ်ဗိုင်းရပ်စ်ကူးစက်မှုဟာ ၄၄,၀၀၀ ကျော် သေဆုံးသူ ၅၄၇ ယောက်ရှိပါတယ်။ အခုချိန်ထိတော့ အိန္ဒိယနိုင်ငံမှာ ဗိုင်းရပ်ကူးစက်ခံရသူ ၈.၇ သန်းကျော် နဲ့ ကမ္ဘာပေါ်မှာ ဒုတိယအများဆုံးဖြစ်ပါတယ်။
ဂျပန်နိုင်ငံမှာတော့ တာဝန်ရှိသူတွေအနေနဲ့ ဗိုင်းရပ်စ်စစ်ဆေးတာတွေနဲ့ ခြေရာခံလိုက်တာတွေတိုးလုပ်ဖို့ နဲ့ လူတွေအနေနဲ့ နှာခေါင်းစည်းတပ်တာ၊ လက်ဆေးတာစတဲ့ ဗိုင်းရပ်စ်ကာကွယ်ရေးတွေကို မဖြစ်မနေ ဆက်လုပ်ဖို့ ဂျပန်ဝန်ကြီးချုပ် Suga က ပြောလိုက်ပါတယ်။ ဖိလစ်ပိုင်မှာတော့ ဒီနေ့မှာ ကူးစက်သူ ၁,၉၀၂ ယောက် နဲ့ သေဆုံးသူ ၃၁ ယောက်ရှိပါတယ်။
Crd VOA News
ယခုကဲ့သို့ နောက်ဆုံးရသတင်းများနှင့် သိရှိလိုသော ဒေသဆိုင်ရာအချက်အလက်များကို www.winnetmyanmar.com နှင့် winnetmyanmar Facebook Page တို့တွင် ဝင်ရောက်ဖတ်ရှု ရေးသား ဆွေးနွေးနိုင်ပါသည်။