ကချင်ပြည်နယ်၊ မိုးကောင်းမြို့၊ ဝေဘူလတောင်ပေါ်တွင် တည်ရှိပါသည်။ ဝေဘူလတောင်သည် ယခင်က ရဟန္တာတောင်ဟုလည်းကောင်း၊ ကေလာသတောင်ဟုလည်းကောင်း ထင်ရှားခဲ့ပါသည်။ သက္ကရာဇ် ၁၃၂၁ ခုနှစ်တွင် မိုးကောင်းမြို့မှ ဒေဝဆရာတော်ဘုရားက ကေလာသတောင်ထိပ်ရှိ အောင်မြေနေရာတွင် စေတီတစ်ဆူတည်ထားပြီး တောင်တန်းတစ်လျှောက်၌ သာသနာပြုလုပ်ငန်းများ ဆောင်ရွက်ခဲ့သည်။ ထိုအချိန်မှစတင်၍ ကေလာသတောင်သည် ဝေဘူလတောင်ဟူ၍ အမည်ပြောင်းလဲကာ ပိုမိုထင်ရှားလာခဲ့ပါသည်။ ဒေ၀ဆရာတော်ဘုရားဦးစီး၍ တည်ထားသော ဝေဘူလတောင်ပေါ်စေတီတော်မှာ မုခ်၀ ၄ ခုရှိပြီး ဗုဒ္ဓရုပ်ပွားတော်တစ်ဆူစီ ထားရှိပူဇော်ထားပါသည်။ စေတီတော်၏ဘွဲ့အား အောင်တော်မူရှင်ဟု သမုတ်ခဲ့ပြီး အရိယာဓာတ်လွှမ်းခြုံထားသော အောင်မြေအရပ်ဖြစ်သဖြင့် ဝေဘူလတောင်၌ အဓိဌာန်၀င်ကြသူတို့မှာ ဆုတောင်းပြည့်ဝသည်ဟု ယုံကြည်ကြပါသည်။
