ကိုယ်ပိုင်သံစဉ် တေးပေါင်းများစွာကို ဖန်တီးရေးသားခဲ့သူ၊ အဆိုတော် စိုင်းထီးဆိုင်၊ ဘိုဖြူ တို့ကို ကျော်ကြားစေခဲ့သူ ဖြစ်သည်။ ရှမ်းပြည်နယ်မြောက်ပိုင်း၊ သိန္နီမြို့၊ ဟိုတဲန့်ရပ်ကွက်၌ (၁၉၄၉)ဧပြီလ(၂၇)ရက်နေ့တွင် မွေးဖွား ခဲ့သည်။ မိဘများမှာ ရှမ်းစာဆိုတော် ဦးရွှေကြီး၊ ကုန်သည် ဒေါ်စိန်ဥ တို့ ဖြစ်သည်။ ဖခင်ဖြစ်သူ ဦးရွှေကြီးမှာလည်း ရှမ်းစာဆိုတော်ကြီး (ကလောင်နာမည်- ခမ်းကာ (တုံဟုံး)ဖြစ်သည်။) တစ်ဦးဖြစ်သည့် အပြင် သိန္နီစော်ဘွားကြီး၏ အမတ်ချုပ်အဖြစ် ဆောင်ရွက်ခဲ့သည်။ သားသမီး ၄ ယောက်အနက် ဒုတိယ သားကြီး ဖြစ်သည်။
နမ္မတူ ပန်ဟိုက်ရပ်မူလတန်းကျောင်းမှာ ပညာစသင်ကြားပြီး နမ္မတူက Our Lady’s Convent ကျောင်းမှာ ၇ တန်းအထိ ပညာသင်ခဲ့သည်။ နောက်တော့ မေမြို့ (ပြင်ဦးလွင်)က စိန့်အဲလ်ဘတ် (St. Albert’s) အထက်တန်းကျောင်းကနေ ၉ တန်းနဲ့ ၁ဝတန်းအောင်ခဲ့သည်။
(၁၉၆၅) တွင် ရှမ်းဘာသာဖြင့် တောင်ကြားတွင်းမှ တောနှင့်တောင် သီချင်းကို ကော်ပီသံစဉ်နှင့် စ၍ရေးခဲ့သည်။
(၁၉၅၆) တွင် ပထမဆုံး ကိုယ်ပိုင်သံစဉ်သီချင်း ရှမ်းသီချင်းဖြစ် သည့် အိပ်မက်ထဲမှ ချစ်ရသူ ကို ရေးသားခဲ့သည်။
(၁၉၆၆) တွင် အထက်တန်းအောင်ပြီး မန္တလေးဆေးတက္ကသိုလ်သို့ တက်ခဲ့သည်။ ဆေးဘွဲ့ရပြီးနောက်မှာ မေမြို့၌ ၄ နှစ်၊ ရန်ကုန်၌ ၆ နှစ်၊ မန္တလေးဆေးတက္ကသိုလ်၌ ၅ နှစ် တာဝန်ထမ်းဆောင်ခဲ့သည်။
(၁၉၆၈) တွင် ရှမ်းသီချင်းများစွာ ရေးခဲ့သည်။
(၁၉၇၁) တွင် ဒေါက်တာ နွဲ့နွဲ့တင်နှင့် လက်ထပ်ပြီး သားသမီး ၄ ယောက်ထွန်း ကားခဲ့သည်။ ထိုနှစ်တွင် လားရှိုး၌ ဖခင် သေဆုံးသည်။
(၁၉၇၂) တွင် The Wild Ones တေးဂီတဝိုင်းကို ထူထောင်ခဲ့သည်။
(၁၉၇၃) တွင် မြန်မာကိုယ်ပိုင်သံစဉ် သီချင်းများကို စပြီးရေးခဲ့သည်။
(၁၉၇၆) တွင် ဆေးပညာဆရာဝန်ဘွဲ့ M.B.B.S ကိုရရှိခဲ့ပြီး မန္တလေးပြည်သူ့ဆေးရုံကြီးတွင် အလုပ်သင် ဆရာဝန်၊ ပြင်ဦးလွင်ပြည်သူ့ဆေးရုံတွင် လက်ထောက်ဆရာဝန်အဖြစ် တာဝန်ထမ်းဆောင်ခဲ့သည်။
ထို့နောက် ဆေးတက္ကသိုလ်(၂)ရန်ကုန်တွင် မဟာသိပ္ပံ (ခန္ဓာဗေဒ) ဘာသာရပ်ကိုဆက်လက်ဆည်းပူးခဲ့ပြီး(၁၉၈၉)တွင် မဟာ သိပ္ပံဘွဲ့ရခဲ့သည်။
(၁၉၉ဝ) တွင် မန္တလေးဆေးတက္ကသိုလ် ခန္ဓာဗေဒဌာနတွင် လက်ထောက်ကထိကတာဝန် ထမ်းဆောင်ခဲ့သည်။
(၁၉၉၅) တွင် ဆေးပင်စင် အငြိမ်းစားယူခဲ့သည်။
မြန်မာနိုင်ငံ တက္ကသိုလ်များ ရှမ်းစာပေနှင့် ယဉ်ကျေးမှုကော်မတီ ဥက္ကဋ္ဌ အဖြစ်တာဝန်ယူပြီး ရှမ်းသီချင်းကဗျာများ၊ ဗုဒ္ဓဘာသာနှင့် ပတ်သက်သော သီချင်းများကို ရေးသားခဲ့သည်။
ဆရာရေးစပ်သီကုံးခဲ့သမျှ များမှာ မြန်မာသီချင်း အပုဒ် (၆ဝဝ)ခန့် ရှမ်းသီချင်း အပုဒ် (၆ဝဝ)ခန့်၊ အင်္ဂလိပ်သီချင်း (၃၅)ပုဒ်ခန့်၊ ကိုယ်တိုင်ရေးကဗျာ အပုဒ် (၁ဝဝ)ခန့်၊ ဘာသာပြန်ကဗျာ အပုဒ် (၃ဝဝ)ခန့်၊ (၇)လုံးစပ်ကဗျာ၁ပုဒ်၊ ကိုယ်တိုင်ရေး ဝတ္တု(၁)ပုဒ်၊ ဘာသာပြန် ဝတ္ထု(၁)ပုဒ်၊ ဘာသာပြန် အဆိုအမိန့် များ (၂ဝဝ) ပုဒ်၊ ဇာတ်ညွှန်း (၅)ပုဒ်တို့ ဖြစ်သည်။
