မဟာအတုလသကျမာန်အောင်ဘုရားသည် ရန်ကုန်တိုင်းဒေသကြီး၊ လှည်းကူးမြို့၊ မြို့မရပ်ကွက်တွင် တည်ရှိပါသည်။ မဟာအတုလသကျမာန်အောင် ဘွဲ့အမည်ရှိ ရှေးဟောင်း လှည်းကူးငါးထပ်ကြီးဘုရားကြီးကို ၁၂၇၁ ခုနှစ် ကဆုန်လပြည့်နေ့တွင် မြေပိုင်ရှင် ဦးဖေ၊ ဒေါ်လေးတို့က ဘုရားရှင်၏ သရီရဓာတ်တော်မွေတော်များ ဌာပနာ၍ စတင်တည်ထားကိုးကွယ်ခဲ့ပါသည်။ မဟာအတုလသကျမာန်အောင်ရုပ်ပွားတော်မြတ်ကြီးသည် ဉာဏ်တော်အမြင့် မဏိတော်မှ ပလ္လင်တော်အထိ ၃၄ ပေ၊ ပုခုံးတော်အကွာအဝေး ၁၆ ပေ ၈ လက်မ၊ ဒူးတော်အကွာအဝေး ၂၇ ပေရှိသော ဥဒိဿစေတီ အမျိုးအစား ဗုဒ္ဓရုပ်ပွားတော်ကြီးဖြစ်ပါသည်။ ၁၂၇၇ ခုနှစ်တွင် လေပြင်းတိုက်ခတ်မှုကြောင့် ဦးခေါင်းတော် မြေခခဲ့သဖြင့် မြေခခဲ့သော ဦးခေါင်းတော်ကို ငါးထပ်ကြီးဘုရား၏ အရှေ့မျက်နှာအရပ်၌ ရှစ်မျက်နှာစေတီတည်ကာ ဌာပနာထည့်သွင်းပူဇော်ခဲ့ကြောင်း အရှင်သိရီန္ဒာဘိဝံသ၏ ဘုရားသမိုင်းစာအုပ်တွင် ဖော်ပြထားပါသည်။ ထိုစေတီတော်၏ ဉာဏ်တော်အမြင့်မှာ ၃၅ပေ ၅ လက်မရှိပြီး လုံးပတ်တော် ၆၄ ပေရှိပါသည်။ ကန္ဓကုဋိတိုက်အတွင်းတွင် နှစ်ကျိပ်ရှစ်ဆူဘုရားရုပ်ပွားတော်များကိုလည်း ကြည်ညိုဖွယ်ရာ ဖူးမြော်နိုင်ပါသည်။ တန်စောင်းတော်ကြီး၏ အပေါ်ဘက်နံရံတွင်လည်း ငါးရာငါးဆယ်ဇာတ်နိပါတ်တော်များ၊ ဗုဒ္ဓဝင်ပြခန်း ၃၈ ခန်းကိုလည်း လက်ရာမြောက်စွာ တွေ့မြင်နိုင်ပါသည်။ ရုပ်ပွားတော်မြတ်ကြီး သီတင်းသုံးရာ ပရဝုဏ်သည် ၂ ဧကခန့်ကျယ်ဝန်းပြီး ဂန္ဓကုဋိတိုက်မှာ ဘုံငါးဆင့်ပြသာဒ်ဖြစ်ပြီး စတုရန်းပေ ၈၀ ကျယ်ဝန်းကာ အမြင့် ၄၅ ပေရှိပါသည်။ နှစ်စဉ်နှစ်တိုင်း တန်ဆောင်မုန်းလပြည့်နေ့တွင်ကျင်းပပြုလုပ်သော နှစ်ကျိပ်ရှစ်ဆူဘုရားပွဲမှာ အထူးစည်ကားပါသည်။ မဟာအတုလသကျမာန်အောင် ဆုတောင်းပြည့်ငါးထပ်ကြီးဘုရား၏ ဗုဒ္ဓပူဇနိယပွဲတော်ကို နှစ်စဉ် တပို့တွဲလဆန်း ၁၂ ရက်နေ့မှ လပြည်နေ့ထိ စည်ကားသိုက်မြိုက်စွာကျင်းပလေ့ရှိပါသည်။
