မောင်သိန်းဆိုင် (၁၉၄၀−၂၀၀၆)

Listing Description

စာရေးဆရာ မောင်သိန်းဆိုင်ကို ၁၉၄၀ ပြည့်၊ ဒီဇင်ဘာလ ၂၀ ရက်တွင် ရန်ကုန်တိုင်း၊ လှည်းကူးအပိုင် ဖောင်ကြီးရွာ၌ ဦးတင့်ဆန်း၊ ဒေါ်အုန်းရီတို့က ဖွားမြင်သည်။ အမည်ရင်းမှာ သိန်းဆိုင်ဖြစ်၍ ငယ်နာမည်မှာ ပိုကာ ဖြစ်သည်။ ဒုတိယကမ္ဘာစစ်အတွင်း ဖောင်ကြီးရွာအား မီးလောင်ဗုံးကျသဖြင့် လှည်းကူး၊ ရန်ကုန်နှင့်ပဲခူးမြို့ များသို့ စစ်ပြေးဘဝဖြင့် လှည့်လည်ပြောင်းရွှေ့နေထိုင်ခဲ့သည်။

၁၉၅၀ ဝန်းကျင်၌ ပဲခူးရှိ အဖွား၊ အဒေါ်တို့နှင့် နေထိုင်လျက်၊ မဇင်းရပ်ကွက်၊ မူလတန်းကျောင်း၊ ဇိုင်းဂနိုင် (မြောက်ပိုင်း) ဆရာကြီးဦးစံအေး ကျောင်းတို့တွင် ပညာသင်ကြားသည်။ အလယ်တန်းနှင့် အထက်တန်းကို ပဲခူး အမှတ် (၁) အစိုးရအထက်တန်းကျောင်း၌ သင်ယူသည်။ ၁၉၅၉ ခုတွင် ဆယ်တန်းအောင်သည်။

အသက် (၁၃) နှစ်အရွယ်တွင် ရေးသားသည့် လည်ဆွဲရတနာ ဝတ္ထုတိုကို ၁၉၅၃ ခု၊ ဇွန်လထုတ် စုံထောက်မဂ္ဂဇင်းတွင် ဖော်ပြခံရသည်။

၁၉၆၀ ပြည့်တွင် အကောက်ခွန်ဌာန၌ တာဝန်ထမ်းသည်။ ကလေးဂျာနယ်၊ သွေးသောက်မဂ္ဂဇင်းတို့တွင် ဝတ္ထုတို၊ ဝတ္ထုရှည်၊ ပုံပြင်၊ ဘာသာပြန်များ ရေးသားသည်။ လျှို့ဝှက်သဲဖို မဂ္ဂဇင်း၌ ပင်တိုင်စာရေးဆရာ ဖြစ်လာသည်။ ၁၉၆၄ ခုတွင် အကောက်ခွန်မှ ထွက်ကာ အချိန်ပြည့် စာရေးဆရာဘဝကို ခံယူသည်။

ဇာတ်ညွှန်းလည်း ရေးသည်။ နှလုံးသား ရေအလျဉ်၊ ရမ္မက်ဇော၊ ညမင်းသား စသည့် ဇာတ်ညွှန်းများမှာ ထင်ရှားသည်။ လုံးချင်း (၁၀၀) ကျော်၊ ဇာတ်ညွှန်း (၇၀)ကျော် ရှိခဲ့သည်။

လျှို့ဝှက်သဲဖို မဂ္ဂဇင်း၊ ပန် မဂ္ဂဇင်းတို့တွင် စာတည်း၊ သည်းထိတ်ဖို မဂ္ဂဇင်း၊ ဇော်ဂျီ မဂ္ဂဇင်းတို့တွင် စာတည်းချုပ် အဖြစ် လုပ်ခဲ့သည်။

ဇော်ဂျီ နှစ်တစ်ရာပြည့်အထိမ်းအမှတ် ကြေးရုပ်ဖြစ်မြောက်ရေးကော်မတီ ဒုဥက္ကဋ္ဌ၊ မြောက်ဥက္ကလာပ စာပေနှင့် စာနယ်ဇင်း ဟောပြောပွဲ၊ ပြဇာတ် ဖြစ်မြောက်ရေး ဥက္ကဋ္ဌ အဖြစ် ထမ်းဆောင်ခဲ့သည်။

၂၀၀၆ ခု၊ နိုဝင်ဘာလ ၂၅ရက်၊ မွန်းလွဲ ၁၂ နာရီ၊ ၂ဝ မိနစ်တွင် ကွယ်လွန်ခဲ့သည်။ ဇနီးဒေါ်ကြည်ကြည်စမ်းနှင့် သားသမီး(၅)ဦး ကျန်ရစ်ခဲ့သည်။